كتب- محمود عرفات
استضاف الكاتب الصحفي مصطفى حمدي الشاعر الغنائي تامر حسين في بودكاست كاسيت، في حلقة اتكلم فيها عن مشواره في كتابة الأغاني، والنجاحات الكبيرة اللي حققها مع أهم نجوم الغناء في مصر والعالم العربي.
واتكلم تامر حسين عن النجاح الكبير اللي حققته أغنية خطفوني لعمرو دياب، خصوصًا بعد الجدل اللي اتعمل حوالين بساطة كلماتها.
وقال تامر حسين: “كتبت حوالي 9 نصوص على لحن خطفوني وكلهم كانوا بكلام تقيل، بس حسّيت إن اللحن محتاج كلمات أبسط. وعمرو دياب دعم الفكرة دي، لأني كنت بفكر في طريقة “الكليك” وتكرار الكلمة عشان أفك شفرة اللحن الخفيف اللي عمله عمرو مصطفى.”
وأكمل تامر: “في ناس عندها فلسفة إن لازم الأغنية تكون بكلام تقيل، وده ينفع في الأغاني الدرامية، بس لكل مقام مقال. وفكرة تكرار الكلمات مش جديدة، وده شفناه عند كبار الفنانين زي أم كلثوم وعبد الحليم اللي قدم أغاني ناجحة بنفس الطريقة زي “زي الهوا و سواح و قولوله الحقيقة”. حتى محمد عبد الوهاب كان وهو بيلحن “يدوّر” الكلمة عشان الجمهور يرددهاله.”
وأضاف تامر:”عمرو دياب قالّي بعد حفله في لبنان: أغنية خطفوني بقت نشيد، أول ما أقول: انت حبيبي، الناس بتردد ورايا. وده دليل نجاح، لأن الجمهور مش دايمًا بيحفظ الكلام التقيل، لكن الكلمة السهلة والخفيفة هي اللي بتعلق في ودنه وبيفضل يرددها. وده منهج ناجح من زمان وبيكمل لحد دلوقتي في كل الهيتس.”
وخلال اللقاء ذكر تامر حسين عن تعاوناته مع نجوم الغناء، وكشف كواليس أغاني كتير كتبها، منها تعاونه الأول مع أنغام في أغنية سيبتلي قلبي، واتكلم عن بداياته في عالم الشعر الغنائي، وعلاقته بالملحن عمرو مصطفى والملحن عزيز الشافعي.
وكشف عن فلسفته في كتابة الأغاني الدرامية، وتأثره بالشعراء الكبار، ودور والده في تشكيل ذوقه الفني من خلال أغاني عبد الوهاب وأم كلثوم وعبد الحليم.
جدير بالذكر أت بودكاست كاسيت تقديم وإعداد الكاتب الصحفي والناقد الموسيقي مصطفى حمدي، وبيتذاع كل خميس على منصات برزنتيشن لايف.
