كتب- هاني هاشم
أشاد المخرج رامي عادل إمام، بـ مايا أشرف زكي في أول تجربة إخراجية لها في دراما رمضان 2026 بمسلسل “حد أقصى”.
وكتب رامي عادل إمام عبر حسابه على فيسبوك: “النهاردة بكتب كابشن مش متعود أكتبه… ومليان مشاعر مش عارف أوصفها .. يمكن لأن أول مرة هقول بإحساس غريب كدة إن في حد طالع من “مدرستي” وأنه من “تلامذتي” وأنا اللي لسه بتعلم لحد دلوقتي .. البنت دي أنا حضرت وشوفت رحلتها خطوة خطوة، إحساس صعب، كبير”.
وأكمل: “من 13 سنة، مايا زكي كان عندها 17 سنة (طبعا هي هتخنقني علشان قولت سنها) كانت لسه طالبة في أولى معهد سينما قسم اخراج، أبوها أشرف زكي حبيب قلبي، سلّمها لي وقال لي: “دي بنتك، من فضلك بهدلها معاك”، ومن اللحظة دي، شفت بنت صغيرة جدًا جدًا وهي بتكبر قدامي في المجال”.
وتابع رامي إمام: “بدأت معايا مساعدة صغيرة، واتعلمت، واجتهدت، واترقّت، من مساعدة لمساعدة أولى وشالتني كتير، لحد ما النهاردة بقت مخرجة في أول عمل ليها السنة دي، في رمضان ٢٠٢٦ إن شاء الله ، ومع مين .. مع أمها ، حبيبتي الغالية روجينا،أيوة هي من عيلة فنية كبيرة”.
وأختتم رامي: “رحلة كاملة شفتها بعيني، بكل تعبها و بكل لحظة قوة وضعف.. الفخر اللي حاسس بيه مش عادي… مش بس عشان وصلت، لكن لأنها تستحق فعلًا المكان اللي هي فيه، عندها شخصية قيادية، حضور، ووعي يخليها مش مجرد مخرجة، لكن واحدة من المخرجات الكبار في مصر إن شاء الله.. بحبك، وبشجعك من قلبي، وواثق في اللي جاي أكتر من أي وقت فات مايا زكي”.
