أعلن الفنان كريم الحسيني عن مشاركته في موسم مسلسلات رمضان 2025 من خلال مسلسل وش السعد، واليوم شكر جمهوره ومحبيه بعد تلقي التهاني.
لكنه أوضح حقيقة مشاركته في مسلسل سيد الناس للفنان عمرو سعد والمخرج محمد سامي، وذلك عبر منشور بصفحته الرسمية على موقع فيسبوك.
وقال فيه: أنا بشكر كل حبايبى اللى باركولى وهنوني على مسلسلى الجديد وش سعد بس هو حصل لبس لازم أوضحه .. الناس كلها الساده الصحفين والزُملاء داخلين يباركولى انى مع أستاذ محمد سامي السنه دى فى مسلسل النجم عمرو سعد الجديد.
وأوضح “الحسيني”: هو الحقيقي أنا كنت أتمنى لأنى بحب مسلسلات أ.محمد سامي من أول كلام على ورق ومسلسل آدم ومع سبق الإصرار ولا أخجل انى أقول انى بقالى أكتر من ١٠ سنين بحاول أني أسعى وأشتغل معاه.
تابع: ده مش عيب .. ده سعي شريف مع مُخرج ناجح كان وش سعد وتيمة حظ وإعادة خلق لنجوم كتيييييير كانوا فى حته تانيه وربنا جعل سامي سبب إنه يخلق منهم حاجه جديده.
أكمل: المهم انى بوضح سوء الفهم ده وبقول تاني شرف ليا انى أشتغل مع الأستاذ محمد سامي وبتمنى لأنى متأكد إن ممكن يكون ميلاد طاقه جديده ليا على إيده.
استطرد: وهاقول تاني لا أخجل إني بقالي سنين بحاول أوصله ويشهد على كلامي ده كلً من أحمد زاهر – المُنتجه مها سليم – هاله صدقي – سلوى عثمان – عمر زهران حبيبي – غاده فلفل – المنتج الفني علي حسن.
أضاف” الحسيني” عن محاولات عمله مع محمد سامي: وأخرهم د. أشرف زكي اللى طلبت منه بشكل مُباشر انى نفسى أشتغل مع سامي فى مسلسله الجديد وهو خلاه الكاستنج دايكتور المحترم خالد صفوت يتواصل معايا وخد الداتا بتاعي عشان توصل للأستاذ سامي .. ومازل عندى أمل إنى أعمل ولو مُشاركه مُميزه معاه السنه دى حتى لو ضيف شرف وده مايقللش مني بالعكس.
وعن إصراره على العمل مع محمد سامي قال: ده طموح ممثل موهوب بيحب اللعبة وشايف مُخرج منور وبيفهم دراما وبينور أى ممثل مجتهد بيشتغل معاه أنا بحب محمد سامى يا جماعه ونفسى ويشرفني أشتغل معاه .. اهو يمكن يكون اللبس وسوء الفهم ده حصل عشان البوست ده يوصله وهاعمل هاشتاج أقول فيه أنا بحب سامي .. أما بالنسبه لمسلسلي وش السعد فده إخراج حبيبي وصاحبي المخرج محمد حمدى اللى بحبه على كل المُستويات وتأليف حبيبي وعِشرة العُمر حسام موسى وعاملين مسلسل حلو وتركيبه حلوه بإذن الله.
واختتم كريم الحسيني المنشور قائلًا: هارجع أقول تاني عشان الناس اللى بتظيط فى الظيطه مش عيب أن ممثل يبقي بيحب مخرج ويبقي حابب يشتغل معاه ياجماعه مهما كان المُمثل ده قديم وخبره .. مش يمكن عشان أنا كده بدور على مُخرج واعي زى الأستاذ محمد سامي يحتضن موهبتى عموماً أنا بحب الأستاذ محمد سامي وعايز أشوفه هه بس كده.
