روت الفنانة مي الغيطي، تفاصيل ما حدث لها خلال وجودها في تايلاند، عبر حسابها الشخصي على موقع التواصل الاجتماعي إنستجرام.
وكتبت مي الغيطي: “فيه ناس كثيرة بتسألني أنا كنت مختفيه ليه.. من ٧ شهور كنت في حادثة حصلت في تايلاند، اتخبطت بعربية نقل فالعربية اللي كنت فيها، واتصبت إصابات بالغة.. حصلي كسر في حوضي، وإصابة في العمود الفقري”.
وتابعت مي الغيطي: وكان عندي إصابات داخلية ونزيف داخلي وتلف في الأعصاب في رجلي.. قعدت في المستشفى أسابيع في تايلاند ورجعت مصر علشان أكون مع أهلي وأتعالج وسط دعمهم.
واستكملت مي الغيطي: مكنتش حابة أشارك اللي حصل وقتها، كنت محتاجة وقت أتعافى بعيد عن أي ضغط.. بعد علاج طبيعي فترة وكل شوية نكتشف حاجة جديدة.. أنا دلوقتي أحسن بكتير جدا الحمد لله ودي حاجة محدش كان متخيلها بعد فتره نسبيا قليلة.
وأوضحت مي الغيطي: حاسة إني كنت عايزة أشارك ده دلوقتي عشان أقول إن الجسم عنده قدرة رهيبة على الشفاء.. أقوى بكتير مما نتخيل وأن التعافي بياخد وقت، بس بييجي.
وأضافت مي الغيطي: لو إنت بتمر بوقت صعب.. أرجوك كون صبور مع نفسك عشان عدم فقدانك إيمانك انك هتكون أحسن بجد بيفرق في قدرتنا على تحمل الصعاب.
