كتب: رضا الحصرى
رصدنا ما كتبه وائل علام وكيل وزارة القوي العاملة بالدقهلية السابق عبر صفحته الشخصية على موقع التواصل الاجتماعي فيسبوك، كلاما مطولاً عن حال التعليم في بلادنا تحت عنوان فيها حاجة غلط ..
وقد جاء ما كتبه نصا كالتالي وكما ورد ..”فيها حاجه غلط..”
- لما تروح تحجز لابنك عند اينشتاين الفيزياء في شهر ٧ يقولك انا قفلت مجموعاتي وبعد وساطات ومشاورات يقولك عشان خاطرك هدخله مجموعة مخصوص ٢٠ طالب يبقى أكيد فيه حاجة غلط
- لما يكون التعليم في السناتر والغرف وتحت بير السلم وعلى السطوح وأي مكان ما عدا المدرسة يبقى أكيد فيه حاجة غلط
- لما التعليم يكون مهنة خريجي كل الكليات والمعاهد والدبلومات و مهنة من لا مهنة له يبقى أكيد فيه حاجة غلطلما الدروس الخصوصية تبدأ من شهر ٧ والمادة الواحدة درسين وتلاتة يبقى أكيد فيه حاجة غلط
- لما ابنك ولا بنتك يا دوب ياكل اللقمة ويطلع من البيت الظهر و يفضل يلف من سنتر ل سنتر ومن غرفة لغرفة لغاية ١١ ليلا ما تعرفش عمل ايه ولا اتلم على مين يبقى أكيد فيه حاجة غلط
- لما يكون مهمة الأم الأساسية تنظيم جدول الدروس والتجهيز للدروس وحل الواجب للدروس ومهمة الأب الأساسية الضرب في الأرض لتجهيز فلوس الدروس يبقى أكيد فيه حاجة غلط
- لما تروح تحجز لأبنك عند إمبراطور الكيمياء يقولك هيعمله اختبار الأول لأنه مبيقبلش الطالب الضعيف مع ان الدرس معمول أصلا للطالب الضعيف يبقى أكيد فيه حاجة غلط
- لكن يا سيادة الوزير” لما تلغي دور المعلم تماما والاعتماد على المنصات التعليمية يبقى بتعالج الغلط بالغلط”لَما تصر ان المعلم يبقى أقل الوظائف مرتب ومميزات يبقى بتعالج الغلط بالغلط
- لما تنزع من المدرس كل الصلاحيات ويكون ملطشة لرؤسائه في العمل ومجلس الأمناء وأوليأء الأمور وحتى الطالب نفسه يبقى بتعالج الغلط بالغلط” لما يكون عندك خريجين بالالاف وعندك عجز فى المدارس ومتعينهمش وتحمل العجز على المدرسين المتعيينين وتطلب خريجين يشتغلوا ببلاش من غير خبرة يبقى بتعالج الغلط بالغلط لما تظل المدارس متهالكة والمناهج عقيمة والامتحانات مهزلة يبقى بتعالج الغلط بالغلط
- لما يبقى الكتاب الخارجي افضل من الكتاب المدرسي وبعض المسئولين ياخدوا نسبة من المبيعات مقابل تأخير تسليم الكتب يبقى فيه حاجة غلط ربنا يكفينا ويكفيكم شر التفكير الغلط والناس الغلط بس المهم محدش يفهمني غلط.مساء الانوار على حضراتكم ..
كان ذلك بيان يوضح تفاصيل نصا ما جاء في صفحة وائل علام وكيل وزارة القوى العاملة بالدقهلية السابق عن مساوئ التعليم في بلادنا.
