كتب – هاني هاشم
تصدر إسم الفنانة إنجي عبدالله، تريند مؤشر البحث “جوجل” بعد إعلانها الإصابة بورم في جذع المخ.
قالت عبر حسابها الشخصي على موقع التواصل الاجتماعي فيسبوك: “عدى ٦ شهور بحاول إتعالج للمرة الثانية من ورم في جذع المخ، وهو مش سرطان، هو ورم حميد، لكن موجود في أخطر مكان في المخ، للأسف كل الدكاتره في مصر، وبره مصر، أساتذة في مجال الأورام والمخ والأعصاب، رفضوا يعالجونى، لأنى أخدت كل جلسات الإشعاع والكيماوي المسموح ليا وللمكان الصعب ده سنة ٢٠١٩، وكنت فاكرة خلاص أنا تمام، لكن للأسف رجعت لي أعراض اسوأ بكتير من زمان، أنا فقدت الإحساس بالجنب اليمين، وصعوبة في البلع وكهربا في جسمى. كله لما بعمل أي حركة بسيطة حتى لما بحرك عيني، وفي حاجات تانيه كتير، حتى أنا رجعت للمستشفى اللي اتعالجت فيها قبل كده، بنصيحة من دكتور، تامر النحاس اللي هو شخصيا رفض يعالجنى، والمستشفى طلبت مني أمضي إقرار، اني مسئولة تماما عن كل اللي ممكن يحصل لي لو اتعالجت، طبعا مشيت من الخوف”.
وأضافت: “دلوقتي أنا مع الدكتور الوحيد اللي وافق إنه يجرب علاجات خفيفة تلطيفية لمحاولة تحسين جودة الحياة مع انتظار معجزة، أنا مش بحاول اتعالج علشان متمسكة بالحياة أنا بس تعبانه جدا بقالي كتير، وبدعي ربنا بحاجه واحدة بس.. اللهم لا نسألك رد القضاء ولكن نسألك اللطف فيه.. الشخص اللي واقف جنبي وبيساعدني ان أعمل أبسط الحاجات اليومية اللي خلاص بقت مستحيلة إني اعملها لوحدي هي اختي اللي عندها ورم في الرئة والمخ مرحلة رابعة، وكنت فاكرة إن أنا اللي هخلي بالي منها، أنا حالتي بتتأخر كل شوية، والمرة دي شفت حاجات صعب اني حتى أوصفها، أنا راضية بقضاء ربنا الصعب أوي أوي ليا ولأختي، لكن الحياة بجد صعبة جدا ومفاجئتها أصعب، أدعولي”.
من هي الفنانة إنجي عبدالله؟
– ملكة جمال مصر عام 1999
– بدأت التمثيل بفيلم “بدر” عام 2001 أمام الفنان يوسف منصور
– تزوجت ألبر بوسوتر القائم بأعمال سفارة تركيا بالقاهرة عام 2015.
– شقيقتها مصابة بورم في الرئة والمخ.
– اكتشفت إصابتها بورم في المخ عام 2016.
– رصيدها الفني 12 عملا فنيا.
– خاضت آخر تجربة فنية لها بفيلم “حسن دليفري” عام 2016.
