كتبت: أوركيد سامي

تصدر الفنان محمد صلاح ادم تريند مواقع التواصل الاجتماعي بعد منشور عبر صفحته بموقع التواصل الاجتماعي فيس بوك قائلًا: “طيب بالنسبة للناس الكتير اللي بتقابلني وتقولي انت فين يافنان احنا بنحبك وانت موهوب قوي وصادق ليه مش بنشوفك في التليفزيون بالسنين وبيجيبوا اللوم عليا.

أزمة الفنان محمد صلاح أدم

وتابع: الناس بيحملوني ذنب اني مش بسعى ومش بكلم المخرجين والمنتجين عوجان مني .. والله العظيم انا بسعى وبكلم المخرجين والمنتجين ومساعدي الاخراج والمنتجين الفنيين والكاستينج دايريكور ولغاية من يومين بروح اعمل اوديشين اللي هو تيست كاميرا و 90 % منهم مش بيردوا اصلا على الموبايل ولا حتى واتساب.

وأكمل: اقولكوا حاجة اقسم بالله انا كنت انتحر في وقت كان صعب جدا عليا نفسيا لولا وقوف بعض الاصدقاء جنبي ورجعوني للحياة تاني واولهم الدكتور أشرف ذكي .. انا ثقتي في ربنا كبيرة ومتأكد انه الميعاد المناسب اللي هو حايختاره بس ارجوكوا متحملونيش انا كمان الذنب لاني مش مستحمل.

وكل مخرج ومنتج ومؤلف وحتى منتج فني سعيتله وكلمته علشان اشتغل معاه ومردش عليا اقسم بالله هو اللي خسران”.

وقال محمد صلاح آدم في تصريحات خاصة لليوم” انا كتبت البوست علشان كنت. في حاله مزاجية سيئة ، الناس بتفضل تلوم عليا و انا مش مقصر و لكن في قلة في العمل و انا بسعي و بعمل الي عليا و لكن تعبت و كنت في حاله نفسية صعبة والدكتور اشرف ذكي كلمني و ساندني”.

وأضاف محمد صلاح آدم أن الازمة ليس شخصية ولكن أزمة عامة في كثير من الفنانين، ليه نجيب التكتوكر و البلوجر في التمثيل واحنا عندنا مبدعين.

يذكر أن الفنان محمد صلاح آدم خريج أكاديمية الفنون المعهد العالي للفنون المسرحية قسم تمثيل وإخراج.