وجّه الفنان تامر حسني رسالة دعم للمخرج محمد سامي، عقب إعلان اعتزاله بعد الانتقادات التي طالت بعض أعماله الأخيرة، مؤكدًا على نجاحه الكبير وتأثيره في الدراما المصرية.
وقال حسني في رسالته إن الانتقادات التي طالت بعض المشاهد لا يجب أن تؤثر على مسيرة سامي، مشيرًا إلى أن النجاحات التي حققها المخرج على مدار 14 عامًا لا يمكن تجاهلها، قدم العديد من الأعمال التي حظيت بإقبال جماهيري واسع، مثل “آدم”، “سبق الإصرار”، “حكاية حياة”، “الأسطورة”، “البرنس”، و”جعفر العمدة”، والتي تصدرت أعلى نسب مشاهدة.
وأكد حسني أن نجاحات سامي جعلته واحدًا من أبرز المخرجين في مصر، حيث أصبحت أعماله تحمل بصمته الخاصة، مشددًا على أن النقد جزء من ضريبة النجاح. كما أعرب عن ثقته في أن الخطوة المقبلة لسامي، التي سيخوضها خارج مصر، ستكون نقلة نوعية في مشواره الفني.
واختتم حسني رسالته قائلًا: “لا تدع لحظة إحباط تنسيك ما قدمته للدراما، خذ استراحة وعد أقوى من أي وقت مضى”، مؤكدًا دعمه الدائم لسامي وثقته في قدرته على تحقيق المزيد من النجاحات.
وكتب تامر حسني في تعليق طويل على منشور اعتزال محمد سامي:”أوعى تفكر تبتعد بسبب أي إحباط! طبيعي يكون في بعض المشاهد اللي الناس انتقدتها، وأنا شخصيًا استغربت بعضها، لأنك مش محتاج تضيفها أصلاً، فإبداعك الحقيقي أهم. لكن زي ما بتقول: الفنون جنون، وأحيانًا الأفكار المجنونة تنجح وأحيانًا لا.
بس ده لا يغير الحقيقة إن دي مجرد مشاهد، مش أعمال كاملة
أنت المخرج الوحيد في تاريخ مصر اللي لم يفشل أبدًا، وحتى لو الحظ ما كانش معاك في عمل أو اتنين خلال 14 سنة، دي حاجة الجمهور مينفعش ينساها لك.
قدمت “آدم”، المسلسل اللي جمع كل المصريين والعرب قدام الشاشة، وبعده “سبق الإصرار” و”حكاية حياة”، اللي كانوا نقلة كبيرة في ديكورات الدراما المصرية، وبعدها “الأسطورة”، “البرنس”، و”جعفر العمدة”، اللي كسروا أرقام المشاهدات، ثم “نعمة الأفوكاتو”، “إش إش”، و”سيد الناس”، وكل واحد فيهم كان يا الأول يا الثاني في المشاهدة.
هزعل منك لو فكرت تمشي محبط وأنت أنجح حد! الشجرة الخضراء الكبيرة ممكن يطلع فيها ورق أصفر بسيط، لكن ده جزء طبيعي من التطور، وأي ناجح لازم يطور نفسه. أعمالك مميزة، والدليل إن الناس بتتكلم عن “مسلسلات محمد سامي”، وحتى اللي بينتقدوك، متابعين أعمالك حرف بحرف. النقد اللي بتواجهه بحجم نجاحك، ودي ضريبة الكبار.
سافر وكمل حلمك وأنت فخور بتاريخك، ومتخليش لحظة إحباط تنسيك إنك صنعت تاريخ في الدراما أنا سعيد إنك كنت شجاع واعترفت ببعض المشاهد اللي كان ممكن تستغنى عنها، وده دليل على تطورك المستمر خد استراحة، وارجع أقوى من الأول واثق إن اللي هتسافر عشانه هيكون خطوة كبيرة لمستقبلك.
متخليش الزعل يخليك تنسى إنت قدمت إيه، وقبل ما الناس تقسو عليك، لازم يفتكروا إنت أسعدتهم لسنين طويلة بأعمالك بقول ده مش بس عشان يفكروك، لكن عشان لو أنت محبط، ترجع أقوى. ربنا يوفقك، وأنا دايمًا في ضهرك يا بطل!”
