خرجت هبة التركي، أرملة اللاعب الراحل إبراهيم شيكا، لاعب الزمالك السابق، عن صمتها لترد بحسم على الأنباء المتداولة التي تزعم أن زوجها الراحل تلقى العلاج على نفقة الدولة، مؤكدة أن هذه الادعاءات “كاذبة وغير منطقية”، ومطالبة الجميع باحترام ذكرى زوجها وعدم المتاجرة باسمه بعد رحيله.
عبر حسابها الشخصي على موقع “فيسبوك”، نشرت هبة التركي منشورًا جاء فيه:”حسبي الله ونعم الوكيل، يا جماعة أي حد ينزل ورقة زي دي اعرفوا إنه كداب، إبراهيم متعالجش على نفقة الدولة”.
وأضافت موضحة:”مع احترامي الكامل للجميع، هو في دار الحق، مستشفى الجوي موجودة، اللي عاوز يسأل هناك يروح ويتأكد بنفسه من الفلوس دي مين كان بيدفع”.
وواصلت حديثها:”الظلم ده لا يرضي الله ولا عباده الصالحين. الناس اللي بتقول خد من الناس فلوس واتعالج على نفقة الدولة، دي محتاجة تتعالج. هو لو خدت فلوس ليه علاج على نفقة الدولة؟ كنت كل شوية أطلع أقول فين العلاج؟ فين العقل؟”.
اختتمت أرملة شيكا منشورها برسالة قوية قالت فيها:”اتقوا الله وارتقوا، الكلام ده غير حقيقي. وناس كتير عاملة حاجات مزورة، ارحموا الراجل في تربته، وكل واحد يخليه في نفسه، وأنا موجودة أرد الكذب عن جوزي”.
ورحل اللاعب إبراهيم شيكا عن عالمنا يوم السبت الماضي، عن عمر ناهز 28 عامًا، بعد صراع مرير مع مرض سرطان المستقيم.
