كتبت خلود سعودي
أيام قليلة وتبدأ انتخابات مجلس الشيوخ، تحظى محافظة الشرقية بأن لديها 7 مقاعد للفردي و6 للقائمة، مما يجعل عملية الإقتراع تكاد تكون صعبة على البعض خصوصا مع ارتفاع أعداد المرشحين.
جريدة اليوم ترصد آراء الأهالي في ريف الشرقية
تواجدت محررة اليوم وسط الأهالي والفلاحين في بعض قرى محافظة الشرقية لكي ترصد آراء المواطنين بكل شفافية وحيادية، وتم اختيار جميع فئات المجتمع من الرجال والشباب والسيدات، وكانت آراء الأهالي كالآتي
قال أحد الفلاحين لليوم” مرشحي مجلس الشيوخ مفيش حد منهم عمل حاجة لينا خلال الفترة الماضية ولا حتى سمعنا عنهم، عندنا شكاوى كتير ومفيش حد بيسعى لحلها، وأنا مش هنزل أشارك في الانتخابات السنة دي علشان كل المرشحين مفيش أي نشاط ليهم قبل كدا، وربنا يولي من يصلح”.
وأضاف أحد الشباب” أنا هنزل أشارك في انتخابات مجلس الشيوخ القادمة لأن الصوت أمانة، ولكن مرشحين الدورة الماضية مفيش حد عمل أي شيء للبلد عندنا، كلهم بيعملوا لمصالحهم الشخصية ومفيش حد بينظر لينا أبدا، وحاولنا نكلمهم في حل مشاكل القرية وللأسف مفيش أي رد إيجابي، بتمنى الشباب ينزلوا يشاركوا ويختاروا الأفضل والي يحس بينا ويحل لينا مشاكلنا”.
وتابعت إحدى السيدات” أنا عمرى ما سمعت عن مجلس الشيوخ دا ولا حد منهم شوفناه حل لينا مشكلة أو عمل مبادرة خيرية للبسطاء، لكن الفترة دي لقيت إعلانات كتير في الطرق والتليفزيون عن انتخابات مجلس الشيوخ والمرشحين، هنزل أشارك علشان أختار الي يساعدونا ولما نحتاجهم نلاقيهم”.
اختلاف كبير بين الأهالي، منهم من يرى أن أعضاء مجلس الشيوخ أخفقوا في حل مشاكل المواطنين، وعدم المشاركة الإيجابية في المجتمع، مؤكدين أنهم لم يسمعوا عن الأعضاء طيلة فترة المجلس، واقتصر دورهم في عمل الدعاية المبهرة أثناء الترشح.
في حين طالب الآخرين أهالي الشرقية بضرورة المشاركة في انتخابات مجلس الشيوخ القادمة لاختيار المرشح المناسب الذي يلبي الاحتياجات ويسعى لحل المشكلات.
